होय, मी भारतीय मुसलमान…!

होय, मी भारतीय मुसलमान…!

जो जातीवादाला नाकारून मानवतेची उंच झेप घेतो, आणि विश्वबंधुत्वाला आपल्या श्वासात जपतो. भारतीय संविधानाप्रती ज्याचं इमान आहे, आणि धर्मसंस्कारांनी ज्याला ह्या मातीतल्या एकनिष्ठतेचीच आचारसंहिता दिली. 

शिक्षण, संस्कृती, समाज आणि राजकारण..या देशाच्या प्रत्येक जडणघडणीत आपल्या ज्ञानाची, श्रमांची आणि नैतिक योगदानाची ज्योत सतत प्रज्वलित ठेवतो.

तलवारीच्या धाकावर नव्हे, तर समतेच्या प्रकाशात इस्लाम स्वीकारणारा… अस्पृश्यतेला झिडकारणारा… मानवी स्वाभिमानाचा रक्षक असा मी भारतीय मुसलमान...

होय, मीच तो भारतीय मुसलमान...

ज्याने जीवाची पर्वा न करता स्वातंत्र्ययुद्धात खांदा लावला, आणि ज्याच्या समाजाने या मातृभूमीच्या स्वातंत्र्यासाठी अमूल्य, भरीव योगदान दिलं. कारण आमच्यासाठी भारत फक्त जन्मभूमी नाही;तर ती आमच्या श्रद्धेचा दीप, निष्ठेची शपथ आणि स्वाभिमानाचा पाया आहे. 

या भूमीच्या मुक्तीच्या संघर्षात जेव्हा धैर्य, बलिदान आणि देशप्रेमाची परीक्षा आली, तेव्हा आमच्या रक्तानेच त्या इतिहासाच्या पानांवर तेज उमटलं.

मी तोच भारतीय मुसलमान ज्याच्या साहित्य-संस्कृतीने नैतिक मूल्यांना अधिष्ठान दिलं; ज्याच्या वास्तुकलेने जगाच्या नकाशावर भारताला एक अद्वितीय गौरव मिळवून दिला; आणि ज्याचं योगदान आजही पर्यटनाच्या माध्यमातून देशाच्या तिजोरीत अमूल्य भर घालतं.

मी तोच भारतीय मुसलमान… 

ज्याने या भूमीच्या कला, साहित्य, सामाजिक चळवळी आणि संगीताला केवळ आकारच दिला नाही, तर त्यांना जागतिक व्यासपीठावर नेण्याच्या प्रवासात स्वतःची ओळखही भारताच्या सांस्कृतिक विविधतेत विलीन केली. 

माझ्या अस्तित्वाचं केंद्र धर्माच्या चौकटीत बंदिस्त नाही; ते या राष्ट्राच्या सर्जनशील वारशाशी, सहअस्तित्वाच्या मूल्यांशी आणि मानवतेच्या विशाल दृष्टिकोनाशी जोडलेलं आहे. 

खाद्यसंस्कृतीला खमंग स्वाद देणारा, पेहरावाला रुबाब आणि शालीनतेचा अर्थ देणारा, आणि कलेला तसेच जीवनशैलीला रंग, सौंदर्य आणि आत्मा देणारा असा मी..भारताच्या बहुरंगी आत्म्याचा अभिन्न शिल्पकार आहे.

आणि जेव्हा समाज विभाजनाच्या चष्म्यातून वास्तव पाहू लागतो, तेव्हा माझी परंपरा त्याला सौम्य पण ठामपणे स्मरण करून देते,की खऱ्या भारतीयतेची मुळे मतभेदांत नाही, तर एकात्मता, सौंदर्यनिर्मिती आणि लोकशाही विचारांच्या अखंड वाहत्या प्रवाहात आहेत. 

मानवतेचा दीप ज्यांनी जपला, त्या परंपरेत माझं वारसत्व आहे; आणि त्या दिव्याला तेज देत राहणं हीच माझी देशाप्रतीची निष्ठा, माझी साधना, आणि माझा स्वाभिमान आहे.

पण मी तोच भारतीय मुसलमान...

ज्याने फाळणीच्या वेळी धर्माधिष्ठित राष्ट्र नाकारून धर्मनिरपेक्षतेचा हात धरला; ज्याने भारतमातेचं प्रेम.. परकीय मोहांवर प्राधान्याने निवडलं; आणि ज्याने आपल्या भूमीवर प्रेमाचं, शांततेचं, आणि राष्ट्रीय एकात्मतेचं बीज पेरलं.

होय, मी बहुसंख्य देशातील अल्पसंख्य भारतीय मुसलमान…

ज्याचं अस्तित्व अनेकदा राजकारणासाठी गरजेचं वाटतं, पण ज्याला हिनवण्याशिवाय काहींची राजकीय गणितं पूर्ण होत नाहीत. आणि तरीही,जगात कुठेही कट्टर आणि दिशाहीन, स्वार्थी धर्मांधता आंतकात बदलली की माझ्यावरचं दहशतीची सावली टाकली जाते.

होय, मी भारतीय मुसलमान…

ज्याच्या इतिहासात फक्त संघर्षच नाही, तर सहजीवनाची शतके आहेत. मंदिर-मस्जिदांच्या सावल्यांतून, ऋषी-महर्षी आणि सूफी-संतांच्या परंपरेतून मला जपायला शिकवलं ते..विरोधातही संवाद, भेदांतही ऐक्य, आणि विविधतेतही एकात्मता..

मतभेदांपेक्षा मूल्यांना, धर्मांपेक्षा मानवतेला, आणि रूढींवरून विवेकाला प्राधान्य देणारी ही शिकवणच माझी खरी ओळख आहे.

मी तो भारतीय मुसलमान…

ज्याला माहित आहे की कोणत्याही देशाचं बळ त्याच्या सामर्थ्यात नसतं तर त्याच्या समाज मनातील न्याय, करुणा आणि समानतेच्या वृत्तीमध्ये असतं. 

म्हणूनच मी मतभेद मिटवण्यासाठी हात पुढे करतो, भीतीचे पूल तोडून विश्वासाचे रस्ते तयार करतो, आणि द्वेषाच्या धुराड्यातही मैत्रीचा दिवा पेटवण्याचा प्रयत्न करतो. 

कारण मला ठाऊक आहे,राष्ट्राची मशाल एका समाजाने नव्हे, तर सर्वांनी एकत्र येऊनच प्रज्वलित होते.

होय, मी भारतीय मुसलमान…

ज्याला माझ्या भारतीयत्वाचा अभिमान आहे, आणि माझ्या मुस्लिमत्वाची सभ्यता आहे. मी या भूमीतला नागरिक म्हणून फक्त हक्क घेण्यासाठी नाही, तर कर्तव्य पार पाडण्यासाठी उभा आहे.

माझ्या श्रद्धेच्या प्रार्थनांइतकाच मला या देशाच्या न्यायव्यवस्थेवर, लोकतंत्रावर, शिक्षणावर आणि आधुनिक भारत घडवणाऱ्या विवेकावर विश्वास आहे. 

मी लढतोय तक्रारींसाठी नाही तर तर्कासाठी... ओळखीच्या राजकारणासाठी नाही तर समानतेच्या भविष्याकरिता.

आजही मी भारतीय मुसलमान… 

विवेक, पुरोगामित्व आणि बंधुभावाची वैचारिक दिशा आत्मसात करून या राष्ट्राच्या एकात्मतेला, सामाजिक समतेला, आणि मानवी प्रतिष्ठेला जपण्यासाठी लढतोय… आपल्या अस्तित्वासाठी नव्हे तर आपल्या योगदानाच्या सत्यासाठी...

आणि म्हणूनच, आजही मी भारतीय मुसलमान…

ज्याने इतिहासाची जपणूक करतानाच भविष्याची वाट निर्माण केली आहे. ज्याच्या स्वप्नांमध्ये फक्त स्वतःचा नव्हे, तर सर्वांचा उजेड आहे. ज्याच्या आवाजात तक्रारीपेक्षा परिवर्तनाचा सूर आहे; आणि ज्याच्या अस्तित्वात “मी” पेक्षा “आपण” जास्त ताकदीनं उभा आहे.

आणि म्हणूनच, माझ्या अस्तित्वाचा शेवट हा संघर्षाच्या कथेनं नाही, तर सहअस्तित्वाच्या संदेशानं व्हावा अशीच माझी इच्छा आहे. 

मी भारतीय मुसलमान म्हणून उभा असताना..

माझी प्रत्येक कृती, प्रत्येक मूल्य आणि प्रत्येक तत्त्व हे या भूमीची एकात्मता, धर्मनिरपेक्ष मूल्य, विवेकी आचरण,करुणा आणि प्रबोधन यांना अधिक दृढ करण्यासाठीच आहे.

कारण राष्ट्राची ओळख ती किती उंच इमारती बांधते यावर नाही, तर ती किती उंच विचार जपते यावर ठरते. 

मी माझ्या श्रद्धेतून सद्गुण घेतो, आणि माझ्या भारतीयत्वातून सामायिक कर्तव्याची ज्योत जिवंत ठेवतो. 

आजचा माझा प्रत्येक पाऊल हा गैरसमजांवर संवादाचा, तिरस्कारावर विश्वासाचा, आणि भेदांवर सामायिक मानवतेचा विजय आहे. 

माझ्या प्रवासाचा सार एकच...!

मी केवळ भारतीय मुसलमान नाही, तर या देशाच्या विवेकाचा, संस्कृतीचा, आणि एकात्मतेच्या उजेडाचा वाहक आहे; आणि हीच परंपरा, हीच निष्ठा, आणि हीच प्रेमभावना मी पुढच्या पिढीकडे अभिमानाने सोपवणार आहे.

धन्यवाद, मित्रांनो..🙏

(टीप : वरील लेख हा विविध मुक्त स्रोतांतील माहिती संकलित करून सादर केलेला संशोधित स्वरूप आहे.)

-एक संविधानप्रेमी सच्चा भारतीय मुस्लिम.. ✍️

#विद्यार्थीमित्र प्रा.रफीक शेख...

-एक साहित्यप्रेमी, विवेकवादी आणि समाजमाध्यमकार..

🔰 The Spirit of Zindagi Foundation

"मानवी सामर्थ्याला जागवणारं प्रेरणेचं क्षितिज..!"

Inspire | Educate | Empower | Excel

🎓 डॉ. ए.पी.जे.अब्दुल कलाम विद्यार्थी फाउंडेशन, परभणी.

"Nurturing Potential Through Education"

शिक्षण | सेवा | प्रेरणा | प्रबोधन | सामाजिकता | संशोधन

#IndianMuslim #UnityInDiversity #HumanityFirst #SecularIndia #ProudIndian #SocialAwareness #PeaceAndUnity #Inspiration #Brotherhood #IndianCulture #IndianHistory #FreedomStruggle #SufiTradition #NationBuilding #EqualityForAll #ConstitutionOfIndia #Empowerment #Vivekवादी #SocialReform #ThoughtLeadership #Harmony #IndianIdentity #MotivationalWriteup #IndianValues #CulturalPride #HistoricalLegacy #UnityMessage #HumanDignity #IndianMuslimsContribution #NationalIntegration #EducateEmpowerExcel #spiritofzindagi, #jaibhim #APJAbdulKalamFoundation #SocialChange #IndianPhilosophy #AwarenessPost #TrendingWriteup #PositiveIndia